پیا وہ صابری پیا لا علاؤالدین صابر کا

پیا وہ صابری پیا لا علاؤالدین صابر کا

ہوا ہے دل یہ متوالا علاؤالدین صابر کا

چلو اے ہمدمو کلیر مزار پاک دیکھ آئیں

علاؤالدین صابر کا علاؤالدین صابر کا

دیارِ ہند میں جنت جسے کہتا ہے کل عالم

وہی ہے روضہ والا علاؤالدین صابر کا

وہاں جاتے ہی جاتے رہتے ہیں وسواس ِ شیطانی

عجب دربار ہے مولا علاؤالدین صابر کا

محبّو اس قدر نورِ ولایت آپ کا چمکا

ہے گھرگھر ہند میں چرچا علاؤالدین صابر کا

ہوائیں صابری چلتی ہیں ہر سو باغِ عالم میں

ہر اک جا گل کھلا دیکھا علاؤالدین صابر کا

مرادِ دل ہوئی حاصل گیا جو آپ کے در پر

یہ دیکھو فیض مولانا علاؤالدین صابر کا

اسی آئینہ دل میں ہمیں وہ بات حاصل ہے

کہ دیکھیں رات دن مکھڑا علاؤالدین صابر کا

ترے بھی در پہ آکے پھر تو فرحتؔ شیر سر رگڑیں

سگِ درگاہ گر بن جا علاؤالدین صابر کا