اے آفتاب مرسلیں نورِ مجسم بالیقیں

اے آفتاب مرسلیں نورِ مجسم بالیقیں

اے رونقِ عرش بریں اے رحمت اللعالمیں

اے قاسمِ دنیا و دیں تختِ رسالت کے نشیں

اپنے لیے کچھ بھی نہیں کملی ہے یا نانِ جویں

اے واقفِ اسرارِ حق اے کاشفِ استادِ حق

اے جامع آیاتِ حق پیغامبر روح الامیں

اے عالمِ علم اللساں شیریں زباں عذب البیاں

سبحانِ وائل بے زباں موسیٰ کو لکنت ہے یہیں

محفل میں صدرِ محترم میدان میں شمشیر دو دم

صورت میں شانِ دلبری سیرت میں فرقِ کفر و دیں

صف بستہ چپ ہوں گے ملک جرأت کسے مارے پلک

اس وقت ہوگا حکمِ رب آ اے شفیع المذنبیں

حور و ملک کی سجدہ گاہ روضہ کا تیرے مرتبہ

نو گنبدِ افلاک پر محوِ تفاخر ہے زمیں

لکھنا ہے نعت مصطفیٰ اے فوقؔ یہ خامہ ہے کیا

یا شاخِ طوبیٰ چاہیے یا شہ پرِ روح الامیں