دین و دنیا میں بسی ہے نکہت کوئے علی

دین و دنیا میں بسی ہے نکہت کوئے علی

وہ کہاں پھولوں میں خوشبو ہے جو خوشبوئے علی

سجدۂ عشاق ہے نظارہ روئے علی

سامنے ہے قبلہ محرابِ ابروئے علی

مدِّ بسم اللہ قرآنی ہے ابروئے علی

والضحیٰ والیل گیسوئے علی روئے علی

حق اگر فرمائے گا تم نے کیا کس کو شفیع

انگلیاں اٹھ جائیں گی سوئے نبی سوئے علی

بحث عشق و عاشقی رہنے دے اے شیخ حرم

تو مقیم کعبہ ہے میں ساکن کوئے علی

کیا خیال آئے کسی کا کیا کسی پر ہو نظر

دل مرا سوئے علی آنکھیں مری سوئے علی

واہ کیا بخشا محمد نے خطابِ بو تراب

سوندھی سوندھی بس گئی مٹی میں خوشبوئے علی

چاند سورج کی ضیا ہے صرف دنیا کے لیے

چاند سورج دیں کے ہیں روئے نبی روئے علی

کام کیا ہم کو کسی کے دین سے اسلام سے

اپنا منہ تو اس طرف ہے، ہے جدھر روئے علی

خلعت شاہی بھی کچھ جچتا نہیں نظروں میں فوقؔ

اس گدائی خرقہ میں آتی ہے خوشبوئے علی