آج زوروں پہ ہے یہ درد_جگر کیا باعث

آج زوروں پہ ہے یہ درد جگر کیا باعث

لی نہ سرکار دو عالم نے خبر کیا باعث

درد و غم میں یہ ہوئی رات بسر کیا باعث

خواب میں آئے نہ سرکار نظر کیا باعث

آ گئی جانے کہیں جوش جنوں کو بھی قضا

نہ ہوا دشت مدینہ میں گزر کیا باعث

کھل گئی ہے رگ دل نشتر غم سے شاید

آج خوں روتے ہیں یہ دیدۂ تر کیا باعث

یاد زلف و رخ انور نے کیا ہے بے کل

جی بہلتا ہی نہیں شام و سحر کیا باعث

ان کی انگلی کی ادا چاند کے دل سے پوچھو

اک اشارے میں ہوا شق قمر کیا باعث

چبھ گئی ہے کہیں سرکار کے مژگاں کی انا

کل نہیں دل کو مرے آٹھوں پہر کیا باعث

ہم کو اللہ و محمد پہ ہے تکیہ واعظ

ورنہ کیوں رہتے یہ دوزخ سے نڈر کیا باعث

پھر کہیں ہجر محمدؐ میں کیا ہے نالے

دل غوثیؔ سے نکلتے ہیں شرر کیا باعث