میں ہوں مدح خواں خاتم المرسلیں کا
میں ہوں مدح خواں خاتم المرسلیں کا
ثنا خواں ہوں سلطان اہل نگیں کا
محمد کی مدحت میں عذب اللساں ہوں
مزہ ہے سخن میں مرے انگبیں کا
محمد شہنشاہ روئے زمیں ہے
محمد ہے سیاح عرش بریں کا
میں دل بستۂ کاکل احمدی ہوں
پریشاں ہوں اس گیسوئے عنبریں کا
میں ہوں عاشق زارِ حسنِ محمد
میں پروانہ ہوں شمع روشن جبیں کا
کرو مجھ پہ امداد یا شاہ عالی
کہ تجھ بن نہیں کوئی اس کمتریں کا
مدینہ میں بلواؤ بندہ کو حضرت
کہ شائق ہوں میں دل سے اس سر زمیں کا
مجھے سائل اب اپنے گھر ہی کا رکھو
کہ دیکھوں نہ دروازہ جا کر کہیں کا
مجھے اپنا دیدار حضرت دکھا دو
کرو دور غم میری جان حزیں کا
نہیں کوئی غمخوار سرورؔ کا حضرت
مصیبت میں دلدار اندوہ گیں کا
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
