ہیں یا محمد ترے ثنا خواں ملک فلک پر زمیں پہ انساں

ہیں یا محمد ترے ثنا خواں ملک فلک پر زمیں پہ انساں

تمہارے دیدار کے ہیں خواہاں ملک فلک پر زمیں پہ انساں

ہے سب کے سینہ میں تیری الفت ہر ایک دل میں تری محبت

تمہیں پہ کرتے ہیں جان قرباں ملک فلک پر زمیں پہ انساں

تمہاری صورت کے دیکھنے کو خدا کی مورت کو دیکھنے کو

کھڑے ہیں آئینہ بن کے حیراں ملک فلک پر زمیں پہ انساں

جمال صورت دکھاؤ حضرت نقاب رخ سے اٹھاؤ حضرت

کہ منتظر ہیں کھڑے ہزاراں ملک فلک پر زمیں پہ انساں

تمام خلقت بہ دین و دنیا تمہیں پہ رکھتی ہے بس بھروسا

تری حمایت پہ ہوں گے نازاں ملک فلک پر زمیں پہ انساں

ہر ایک کس کو بملک ہستی سکھائی تو نے ہی حق پرستی

تیرے ہیں سب زیر احساں ملک فلک پر زمیں پہ انساں

تو سب کا مالک تو سب کا آقا تو سب کا حاکم تو سب کا داتا

پکڑ ہی بیٹھے ہیں تیرا داماں ملک فلک پر زمیں پہ انساں

تمہیں پہ اے پادشاہ امت ہمیشہ سب بھیجتے ہیں رحمت

با مرِ یزداں و حکمِ قرآں ملک فلک پر زمیں پہ انساں

ہے یاد ہر اک کو نام تیرا خیال ہے صبح و شام تیرا

تمہارا رکھتے ہیں ذکر ہر آں ملک فلک پر زمیں پہ انساں

یہ سب ظہور محمدی ہے کمال نور محمدی ہے

ہوئے چو پیدا بملک دوراں ملک فلک پر زمیں پہ انساں

فلک سے حضرت زمیں پہ پہنچے زمیں سے عرش بریں پہ پہنچے

کہ تھےزیارت کے سارے خواہاں ملک فلک پر زمیں پہ انساں

خدا نے خلقت کو اتنا بخشا خزانہ دیں محمدی کا

کہ ہینگے دولت سے میر میراں ملک فلک پر زمیں پہ انساں

با ضطراب جمال ابرو بہ پیچ و تاب خیال گیسو

کبھی ہیں حیراں کبھی پریشاں ملک فلک پر زمیں پہ انساں

رہے تو ذاکر مدام سرور اؔگر بذکر شفیع اکبر

ترے رفاقت میں ہوں غزل خواں ملک فلک پر زمیں پہ انساں