محمد کا نہ گر نام و نشان اول عیاں ہوتا

محمد کا نہ گر نام و نشان اول عیاں ہوتا

عیاں نام و نشاں کا بھی کہاں نام و نشاں ہوتا

کہاں اوج فلک پر جلوہ گر شمس و قمر ہوتے

کہاں شام و سحر گردش میں دور آسماں ہوتا

محمد گر نہ ہوتے باعث اس ہستی کی ہستی کے

کہاں یہ حور و غلماں اور کہاں یہ انس و جاں ہوتا

نہ کوئی نیک و بد دنیا ئے فانی میں نظر آتا

نہ یہ خرد و کلاں ہوتا نہ یہ پیر و جواں ہوتا

نہ ہوتا گل کے آگے بلبلوں کا اس قدر مجمع

نہ اتنا سرو کے سر پر ہجوم قمریاں ہوتا

کوئی کرتا نہ بندوں کو ہدایت حق کے رستے کی

نہ کوئی راہ دیں پر رہنمائے گمراہاں ہوتا

نظر آتے نہ وحدت سے کبھی انوار کثرت کے

نہ کثرت سے کبھی وحدت کا یہ جلوہ عیاں ہوتا

گل خنداں کبھی ہنستا نہ اس گلزار ہستی میں

نہ اس گلشن پہ ابر آذری گوہر فشاں ہوتا

ہلاتا کون لب دنیا میں ذکر ذات باری میں

زمانے میں خدا کا نام کس کے بر زباں ہوتا

اجل دیتی اگر مرنے سے فرصت دوستو مجھ کو

سدا حاضر ثنا خوانی میں سرورؔ مدح خواں ہوتا