دل میں یادِ خدا لب پر ذکرِ نبی زندگی ہو رہی ہے مری یوں بسر

دل میں یادِ خدا لب پر ذکرِ نبی زندگی ہو رہی ہے مری یوں بسر

مرکزِ آرزو، مقصدِ زندگی، نورِ قلب و نظر کوئے خیرالبشر

سر کے بل کیوں نہ جاؤں میں سوئے حرم روزِ افزوں ہے عشقِ شفیعِ امم

کیا جچے اب نگاہوں میں باغِ ارم، ہے دیارِ نبی مجھ کو محبوب تر

کیا بتاؤں مجھے آج کیا مل گیا، مرحبا عشقِ خیرالوریٰ مل گیا

غرقِ حبِّ شہِ دیں، دل و جاں ہوئے، محوِ دیدارِ صلِ علیٰ ہے نظر

اللہ اللہ! وہ ارضِ پاکِ حرم، ثبت ہیں میرے آقا کے جس پر قدم

اس کی عظمت پہ جان کیوں نہ قربان ہو، جس کا ایک ایک ذرہ ہے رشکِ قمر

مجھ کو عشقِ نبی والہانہ ملے چومنے کو وہ پاک آستانہ ملے

اب نہ مشتاقِ سیم و زر دہر ہوں اور نہ نازشؔ طلب گارِ لعل و گہر