فخرِ ہندوستان تھے خسرو

فخرِ ہندوستان تھے خسرو

ہند کے ترجمان تھے خسرو

روحِ جمہوریت سمجھتے تھے

کل وطن کی زبان تھے خسرو

شہ نشینوں میں خانقاہوں میں

باعثِ عز و شان تھے خسرو

وقت کی ہولناک ظلمت میں

زندگی کا نشان تھے خسرو

بات ہے یہ بیان سے باہر

کس قدر خوش بیان تھے خسرو

کافرِ عشق کعبہ سنت

بت کدے میں اذان تھے خسرو

شیرِ ہندی میں تھی شکر اردو

کتنے شیریں زبان تھے خسرو

شیخ و پنڈت سبھی ہیں شیدائی

شیخ و پنڈت کی جان تھے خسرو

کلمہ گویوں کی شان تھی ان سے

فنِ آذر کی آن تھے خسرو

تھے خدا و رسول سے نزدیک

حاضرِ لامکان تھے خسرو

خواجۂ راستین کے عاشق

فقر کا امتحان تھے خسرو

روحِ گلزارِ دین و دنیا تھے

رونقِ دو جہان تھے خسروؔ