درِ اقدس پر ہوں اب تو میں حاضر یا رسول اللہ

درِ اقدس پر ہوں اب تو میں حاضر یا رسول اللہ

زباں میری ہے کچھ کہنے سے قاصر یا رسول اللہ

طبیعت میں عجب کچھ کیف و مستی کا سا عالم ہے

کرم کی اک نظر ہم پر ہو ظاہر یا رسول اللہ

کھڑا میں دیکھتا ہوں آپ کے انوار کی بارش

زمین و آسمان سب پر ہے دائر یا رسول اللہ

شفاعت کی طلب ہے آپ سے بس روزِ محشر میں

نہ ہو اب یہ گدا نظروں سے باہر یا رسول اللہ

بلا لینا انہی قدموں میں واپس آپ پھر مجھ کو

خدارا اک بلاوا میری خاطر یا رسول اللہ

جنازہ ہو یہاں میرا اسی گنبد کے سائے میں

یہی اک آرزو لے کر ہوں حاضر یا رسول اللہ

حبیبِؔ بے نوا کی قبر ہو اس پاک مٹی میں

سکوں پائے یہ اس دھرتی میں آخر یا رسول اللہ