کیا کلکِ رواں سے ہو ثنائے شہِ کلیر

کیا کلکِ رواں سے ہو ثنائے شہِ کلیر

جب اوجِ ولایت پہ ہوپائے شہِ کلیر

ہے خلعتِ شاہانہ روائے شہِ کلیر

الفقر کی زینت ہے قبائے شہِ کلیر

دل لے گئی اللہ ادائے شہِ کلیر

کیوں کر نہ کروں جاں فدائے شہِ کلیر

جامِ مئے توحید پلائے شہِ کلیر

بیگانہ زمانے سے بنائے شہِ کلیر

بھر دے مرے دامن کو سخائے شہِ کلیر

مستغنی بنا مجھ کو عطائے شہِ کلیر

سرکار میں جو آئے تہیدست نہ جائے

ہے بہرِ جہاں عام صلائے شہِ کلیر

یہ دل کی تمنا ہے کہ حاصل ہو حضوری

دربارِ معلیٰ میں بلائے شہِ کلیر

مرجاؤں بھی تو خلق نہ مجھ کو کہے مردہ

وہ شانِ مسیحائی دکھائے شہِ کلیر

جو ہوگیا اللہ کا اس کا ہوا اللہ

خالق کی رضا جان رضائے شہِ کلیر

رتبے میں فزوں ہیں وہ سلاطینِ جہاں سے

بن بیٹھے ہیں اے دل جوگدائے شہِ کلیر

مخدومِ جہاں آپ ہیں مقبولِ خدا آپ

کیا شان مراتب ہے برائے شہِ کلیر

جو چاہے رواںؔ مانگ درِ فیض کھلا ہے

محروم نہ پھیرے گی سخائے شہِ کلیر