طوطیٔ ہندوستاں ہے خسروِ شریں زباں

طوطیٔ ہندوستاں ہے خسروِ شریں زباں

تاجدارِ شاعِراں ہے خسروِ شیریں زباں

علم و فن کا راز داں ہے خسروِ شریں زباں

اک جہاں اندر جہاں ہے خسروِ شریں زباں

قبلۂ روشن دلاں ہے خسروِ شریں زباں

کعبۂ دیدہ و راں ہے خسروِ شریں زباں

خلق می گوید کہ خسرو بت پرستی می کند

جب کہ خود ایماں کی جاں ہے خسروِ شیریں زباں

جس کو دہرائے گی دنیا انجمن در انجمن

عشق کی وہ داستاں ہے خسروِ شریں زباں

آشنائے کیف و مستی، محرمِ حسن و جمال

صدر بزمِ دلبراں ہے خسروِ شیریں زباں

اتحاد و اتفاق باہمی اس کا پیام

صلحِ کل کا ترجماں ہے خسروِ شریں زباں

ہندو و مسلم ہیں دونوں اس کی زلفوں کے اسیر

فخرِ ناقوس و اذاں ہے خسروِ شریں زباں

اس کی بخشش کا بہانہ ہے حفیظؔ اس کا کلام

مصطفیٰ کا مدح خواں ہے خسروِ شریں زباں