ہمیشہ اپنے بندوں پہ رہا لطف و کرم تیرا

ہمیشہ اپنے بندوں پہ رہا لطف و کرم تیرا

سہارا بے سہاروں کو میسر ہے بہم تیرا

گناہوں کی سیہ چادر لپیٹے جو بھی آتا ہے

سبھی کو اپنے دامن میں چھپاتا ہے حرم تیرا

شہنشاہوں کے دروازے تو اکثر بند ملتے ہیں

کھلا رہتا ہے منگتوں پر سدا بابِ کرم تیرا

میں خود بھی ہوں بہت چھوٹا، مرے الفاظ بھی چھوٹے

سو کیوں کر مجھ سے ہو پائے گا ذکرِ حق رقم تیرا

مرے دامن میں کیا میرا سبھی انعام ہے تیرا

یہ توفیقِ ثنا تیری یہ قرطاس و قلم تیرا

مرے ہاتھوں نے تھاما ہے ترے محبوب کا دامن

جلیلِؔ بے نوا پر کیا یہی احسان کم تیرا