ذکرِ صلِ علیٰ ہے زباں پر کیسی خوشبو فضا میں رچی ہے

ذکرِ صلِ علیٰ ہے زباں پر کیسی خوشبو فضا میں رچی ہے

سارا ماحول نکھرا ہوا ہے اور ہواؤں میں بھی تازگی ہے

اتنا میٹھا ہے اسمِ محمد اس کی شیرینی کیوں کر بیاں ہو

ہونٹ لیتے ہیں آپس میں بوسے اس قدر نام میں چاشنی ہے

تھا زمانے میں ظلمت کا ڈیرا آپ آئے تو پھوٹا سویرا

چہرۂ دلربا کے تصدق سارے عالم میں یہ روشنی ہے

لب پہ نغمے ہوں نعتِ نبی کے ہاتھ میں دامنِ مصطفیٰ ہو

کوئی پوچھے کوئی اور خواہش میں کہوں بس یہی آخری ہے

میرے سرکار قدرت نے تجھ کو ہے سراجاً منیرا بنایا

نور ہی نور ہے اس فضامیں جس جگہ تیری جلوہ گری ہے

اب تو مجھ کو مدینے بلا لو، اپنے پیاسے کو جلوہ دکھادو

تیرے درشن سے ہی بجھ سکے گی میری آنکھوں میں جو تشنگی ہے

یہ جلیلؔ آکے در پر کھڑا ہے اور ہونٹوں پہ یہ التجا ہے

آپ اپنی غلامی میں لے لیں، بس یہی حاصلِ زندگی ہے