آپ کا نامِ نامی ہے وردِ زباں مرے دل میں ہے بس آرزو آپ کی

آپ کا نامِ نامی ہے وردِ زباں مرے دل میں ہے بس آرزو آپ کی

اک مجھے ہی نہیں اے مرے چارہ گر سارے عالم کو ہے جستجو آپ کی

ہے مزمل شہا پیرہن آپ کا ہر زمانہ ہے شاہ زمن آپ کا

کس قدر شان والا کلام آپ کا سارا قرآن ہے گفتگو آپ کی

آپ کا اسمِ عالی جہاں سے جدا سارے عالم میں چرچا اسی نام کا

ذکرِ صلِ علیٰ مرحبا مرحبا ہو رہی ہے ثنا کوبکو آپ کی

ہم تو ڈوبے تھے آقا خدا کی قسم رکھ لیا آپ نے بے کسوں کا بھرم

بس یہ نسبت سہارا بنی ہر جگہ ساری امت ہوئی سرخرو آپ کی

جن کے جھولے جھلاتے رہے ہیں ملک جن کی پیشانیوں میں ہے نوری جھلک

آپ کے لاڈلے یہ حسین و حسن دونوں تصویر ہیں ہوبہو آپ کی

آپ کے در کی نسبت سلامت رہے یہ سلامت رہے تا قیامت رہے

ہے جلیلؔ اپنے دل کی یہی آرزو دفن ہونے کو مل جائے کو آپ کی