یا رب ہمیں دکھا دے بطحیٰ کی اب فضائیں
یا رب ہمیں دکھا دے بطحیٰ کی اب فضائیں
ہم بھی ترے حرم میں دل کی لگی بجھائیں
کر کے طوافِ کعبہ آ جائیں ملتزم پر
اپنے کریم رب کو پھر عرضیاں سنائیں
میزاب کے ہوں نیچےبرسے کرم کی بارش
رحمت کے پانیوں سے جی بھر کے ہم نہائیں
صحنِ حرم سے ہو کر مسعیٰ میں ہاجرہ کی
بین الصفا و مروہ دہرائیں وہ ادائیں
پہلو میں تیرے گھر کے چومیں گے سنگِ اسود
آنسو بہا کے اپنی دھوئیں گے سب خطائیں
تکتے ہوں تیرا کعبہ دامن ہمارے وا ہوں
ہم پر بھی آ کے برسیں رحمت بھری گھٹائیں
جاکر حطیم میں پھر ہم بھی پڑھیں نوافل
سجدے میں جب گریں تو جاں سے گزر ہی جائیں
میری جلیلؔ رب سے بس التجا یہی ہے
جائیں اگر حرم کو پھر لوٹ کر نہ آئیں
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
