اسلام تری شان مرا مولیٰ علی ہے

اسلام تری شان مرا مولیٰ علی ہے

ایمان تری جان مرا مولیٰ علی ہے

سرکار دوعالم کا یہ فرمان ہے شاہد

ایمان کی پہچان مرا مولیٰ علی ہے

وہ جس پہ نظر کر دیں ولایت ہے اسی کی

ولیوں کا وہ سلطان مرا مولیٰ علی ہے

النظر الی وجہ علی ٹھہری عبادت

کس درجہ وہ ذیشان مرا مولیٰ علی ہے

ہجرت کی عجب رات ہے بستر پہ نبی کے

سویا ہوا مہمان مرا مولیٰ علی ہے

قاتل کو تواضع میں پلاتا ہے جو شربت

وہ ایک ہی انسان مرا مولیٰ علی ہے

دارین میں آقا نے اخی جس کو بنایا

وہ خاصۂ خاصان مرا مولیٰ علی ہے

لجپال ہے اتنا کہ محبین کے ہر دم

ہر درد کا درمان مرا مولیٰ علی ہے

جس پر ہیں جلیلؔ اپنے دل و جان بھی قربان

وہ صاحبِ ایمان مرا مولیٰ علی ہے