ہر نظر پاک ہر سانس پاکیزہ تر

ہر نظر پاک ہر سانس پاکیزہ تر

ہر نفس یاد طیبہ میں عنبر فشاں

سر میں سودائے عشق دیار عرب

دل میں یاد شہنشاۂ کون و مکاں

مستی شوق میں بھی ہے پیش نظر

جادہ شہر محبوب کا ہر نشاں

کوہساروں کے بھی خم بہ خم سلسلے

ریگزاروں کی بھی وسعت بے کراں

سرسراتی ہواؤں کے بھی زمزمے

دل کشا وادیوں کی بھی خاموشیاں

وہ مقدس مقامات روح الامیں

وہ مکرم نشانات رب جہاں

ہر تصور میں انوار بیت الحرم

ہر تخیل میں یثرب کی رعنائیاں

وہ تجلی بد اماں مدینے کی شب

وہ حدود حرم میں سحر کی اذاں

بات میں دلکشی چال میں دلبری

آج بندوں پہ ہے قدسیوں کا گماں

رخ پہ تابندگی دل میں پاکیزگی

عزم میں پختگی ہر تمنا جواں

جرم و عصیاں کے احساس سے بھی حزیں

حاضری کی سعادت پہ بھی شادماں

اللہ اللہ یہ ہنگام کیف آفریں

اے خوشا بخت یہ ساعت کامراں

آج ہے روح کونین بھی وجد میں

عشق ہے اپنی منزل کی جانب رواں