یہ مہر و ماہ کے جلوؤں میں نور تجھ سے ہے

یہ مہر و ماہ کے جلوؤں میں نور تجھ سے ہے

خدا کی شان کا سارا ظہور تجھ سے ہے

یہ عرش و فرش یہ پست و بلند و موجودات

تمام سلسلہ رنگ و نور تجھ سے ہے

تیری عطاؤں کے قربان رحمت عالم

سکوں پذیر دل نا صبور تجھ سے ہے

مرے کلام میں ہے تیری یاد کی خوشبو

میری نواؤں میں کیف و سرور تجھ سے ہے

کلیم و طور کی رنگین داستاں کی قسم

فروغ جلوہ زیبائے طور تجھ سے ہے

زہے نصیب کہ ہے مورد نگاہ کرم

فقیر بے سر و ساماں کہ دور تجھ سے ہے

شفیع روز جزا بے عمل سہی مظہرؔ

گناہ گار کو نسبت ضرور تجھ سے ہے