آؤ کہ ذکر حسن شہِ بحر و بر کریں

آؤ کہ ذکر حسن شہِ بحر و بر کریں

جلوے بکھیر دیں شب غم کی سحر کریں

مل کر بیان محاسن خیرالبشر کریں

عشق نبی کی آگ کو کچھ تیز تر کریں

جو حسن میرے پیش نظر ہے اگر اسے

جلوے بھی دیکھ لیں تو طواف نظر کریں

وہ چاہیں تو صدف کو دُر بے بہا لے

وہ چاہیں تو خزف کو حریف گہر کریں

فرمائیں تو طلوع ہو مغرب سے آفتاب

چاہیں تو اک اشارے سے شقِ قمر کریں

کونین کو محیط ہے سرکار کا کرم

سرکار آپ ہم پر کرم کی نظر کریں

راہ نبی میں غیر پہ تکیہ حرام ہے

اے عشق آ کہ بے سر و ساماں سفر کریں

دل میں بھی ہو درود زباں پر بھی ہو درود

یوں منزل حبیب کی جانب سفر کریں

کونین وجد میں ہوں جنوں نغمہ بار ہو

یعنی جہان ہوش کو زیر و زبر کریں

چومیں ہر ایک ذرہ راہ رسول کو

سجدے قدم قدم پر سر رہ گذر کریں

آنسو قبول ہوں در خیرالانام پر

نالے طواف روضہ خیرالبشر کریں

شعر و ادب بھی آہ و فغاں بھی ہے ان کا فیض

پیش حضور اپنی متاع ہنر کریں

اب کے جو قصد طیبہ کریں رہبران شوق

مظہرؔ کو بھی ضرور شریک سفر کریں