ہیں فدایانِ جمالی شہِ مکی مدنی

ہیں فدایانِ جمالی شہِ مکی مدنی

رومی و شامی و طوسی و عراقی، یمنی

تاحد صحنِ چمن مطلع انوار نبی

ہو کے قرباں رخ محبوب پہ صبح چمنی

دردنداں پہ تصدق ہیں عدن کے موتی

لب اقدس پہ فدا سرخی لعل یمنی

آئینہ ساز نظر آتا ہے آئینے میں

حق کی توصیف ہے مدحِ شہِ مکی مدنی

اور بھی تڑپا ہے دل اور بھی بھڑکی ہے یہ آگ

مل گیا ہے جو رہِ شوق میں کوئی مدنی

نقش ہے آلِ محمد کی محبت دل میں

شکر ایزد مری نسبت ہے حسینی حسنی

ترا فیضان محبت ترا اعجازِ نظر

سوز صدیق تب و تاب اویس قرنی

دل میں ہیں جلوہ فگن نعت نبی کے انوار

اب مرے دل کا ہر ذرہ ہے ہیرے کی کنی

درس آموز نواریزی و جاں بخشی ہے

خوش نوایانِ چمن میں تری شیریں سخنی

بے نیاز در شاہان زماں ہے مظہرؔ

ہے فقیری میں بھی سرکار کا درویش غنی