جلوہ احمد دکھایا کون تھا

جلوہ احمد دکھایا کون تھا

آدم و حوا بنایا کون تھا

رو برو ہو کر انا کہتا رہا

مثل آئینہ ہوا تھا کون تھا

خود نمائی سے ہوا جلوہ کناں

چشم مردم میں بسا تھا کون تھا

شان مخلوقات میں آئی نظر

آشکارا آپ خود تھا کون تھا

طے ہوا جھگڑا تو یکسوئی ہوئی

بندہ خود مولانا بنا تھا کون تھا

ہر صفت کو نیک و بد کہتے رہے

وعظ منبر پر کہا تھا کون تھا

عالم و دانا و دیوانہ بنا

واضعِ حکمِ شرع تھا کون تھا

روپ ہر ہر طرح کے لیے رہے

عاشق دوالہ ہوا تھا کون تھا

کعبہ و دیر و حرم مسجد کی شان

مؤمن و کافر بنا تھا کون تھا

آپ ہی وہ شان گونا گوں لیے

حسن اپنا دیکھتا تھا کون تھا

جان کر انجان لاعلمی سے وہ

لفظ امی کا کہا تھا کون تھا

شیفتہ والہ زلیخا خواب میں

نور یکتا کو دکھایا کون تھا

شانِ موسیٰ بن کے آئی طور پر

من راٰنی کو کہا تھا کون تھا

نام احمد کا خدا کی ذات ہے

پردہ بندہ کا لیا تھا کون تھا

ہو گیا موجود وہ کہہ کر انا

دائرہ مرکزؔ بنا تھا کون تھا