حریم کبریا اللہ اکبر

حریم کبریا اللہ اکبر

وہ نورانی فضا اللہ اکبر

جوارِ کعبۃ اللہ اللہ اللہ

بہارِ جاں فزا اللہ اکبر

تصور میں وہ معمارِ حرم ہے

خلیلِ باصفا اللہ اکبر

وہ راہِ امتحاں گاہِ محبت

وہ بی بی ہاجرہ اللہ اکبر

نظر اللہ کی چشم کرم پر

زباں صرفِ دعا اللہ اکبر

وہ پانی کی تلاش و جستجو میں

رہِ کوہِ صفا اللہ اکبر

بفضلِ ایزدی اک چشمۂ فیض

وہیں جاری ہوا اللہ اکبر

جسے کہتی ہے دنیا آبِ زمزم

وہ ہے بحرِ عطا اللہ اکبر

چلے ہیں امتحاں گاہِ وفا میں

خلیلِ کبریا اللہ اکبر

خدا کی راہ میں قربان کرنے

متاعِ بے بہا اللہ اکبر

وہ قربانی کا عالم اللہ اللہ

وہ میدانِ منا اللہ اکبر

ذبیح اللہ کا وہ سر جھکانا

وہ تسلیم و رضا اللہ اکبر

یہ منظر دیکھتے ہی کانپ اٹھے

سبھی ارض و سما اللہ اکبر

فضائے قدس میں ہر سمت گونجی

صدائے مرحبا اللہ اکبر