بھلا سکتا نہیں میں آپ کا احسان یا خواجہ

بھلا سکتا نہیں میں آپ کا احسان یا خواجہ

ہوا ہے آپ سے روشن یہ ہندوستان یا خواجہ

نظر آجائے مجھ کو خواب ہی میں آپ کا جلوہ

یہی میری تمنا ہے، یہی ارمان یا خواجہ

در اقدس سے جب مشکل کشائی سب کی ہوتی ہے

ہماری مشکلیں کر دیجئے آسان یا خواجہ

ہمارے لب پہ ہر دم آپ ہی کا نام نامی ہے

ہمارا جان و دل ہے آپ پر قربان یا خواجہ

بھلا کیوں کر نہ مجھ کو ناز ہو اپنے مقدر پر

مرے دل میں نظر میں آپ ہیں مہمان یا خواجہ

سنا جاتا نہیں دنیا کا مجھ سے طعنِ ناداری

خدا را غیب سے ہوجائے کچھ سامان یا خواجہ

شہنشاہی سے بڑھ کر آپ کے در کی گدائی ہے

کسی کا ہو نہ ہو میرا ہے یہ ایمان یا خواجہ

کرم کیجئے کہ اس مجبور کی دنیا بدل جائے

اک عرصے سے حمیدؔ زار ہے حیران یا خواجہ