کوئے جاناں سے اڑا لا بوئے یار

کوئے جاناں سے اڑا لا بوئے یار

لطف فرما اے نسیم کوئے یار

وادیٔ ایمن بنا ہے کوئے یار

اللہ اللہ رے جمالِ روئے یار

رہروِ الفت کی ہے منزل یہی

ہے سرائے عشق بے شک کوئے یار

دل فدائے ابروئے خمدار دوست

آنکھ مشتاقِ جمالِ روئے یار

حسن ہے غیرت دہِ ماہِ فلک

رشک طوبیٰ ہے قدِ دل جوئے یار

مسطرِ مصحف ہے گویا خطِ رخ

نقطۂ قرآں ہے خالِ روئے یار

کیا کوئی آنکھیں دکھائے گا مجھے

ہوں قتیل نرگسِ جادوئے یار

تیرے کشتہ ہیں ہزاروں اہل دل

مرحبا اے خنجرِ ابروئے یار

کیا ہجومِ طالبانِ دیدہ ہے

حشر کا میداں ہے گویا کوئے یار

رستگاری ہے مرے دل کے محال

اک بلا ہے حلقۂ ہر موئے یار

تیرے پر تو سے ہیں روشن ماہ و مہر

واہ کیا کہنا جمالِ روئے یار

گل پہ بلبل سرو پر قمری فدا

دل کھنچا جاتا ہے اپنا سوئے یار

دل ہزاروں کے زبردستی لیے

اللہ اللہ قوتِ بازوئے یار

اس کا شیدا اک فقط میں ہی نہیں

سارا عالم ہے فدائے روئے یار

اور حامدؔ بھول بیٹھے سب کو ہم

ہے فقط یادِ رخِ نیکوئے یار