حقیقت میں وہ لطفِ زندگی پایا نہیں کرتے

حقیقت میں وہ لطفِ زندگی پایا نہیں کرتے

جو یادِ مصطفیٰ سے دل کو گرمایا نہیں کرتے

زبان پر شکوہِ رنج و الم لایا نہیں کرتے

نبی کے نام لیوا غم سے گھبرایا نہیں کرتے

محمد مصطفیٰ کے باغ کہ پھول ایسے ہیں

یہ بے پانی کے تر رہتے ہیں مرجھایا نہیں کرتے

ندامت ساتھ لے کر حشر میں اے عاصیو جانا

سنا ہے شرم والوں کو وہ شرمایا نہیں کرتے

اگر ہو جذبۂ صادق تو اکثر ہم نے دیکھا ہے

وہ خود تشریف لے آتے ہیں تڑپایا نہیں کرتے

جو ان کے دامنِ رحمت سے وابستہ ہیں اے حامدؔ

کسی کے سامنے وہ ہاتھ پھیلایا نہیں کرتے