دامنِ رحمت جمال اُن کا ہے اپنے ہاتھ میں

دامنِ رحمت جمال اُن کا ہے اپنے ہاتھ میں

عرش سے ہو کر جو آئے ہیں فقط اک رات میں

کیوں نہ اُن کے حکم کے تابع ہو ساری کائنات

جب خدا ہی بولتا ہے مصطفیٰ کی ذات میں

مومنوں کی ماں نے بتلایا کہ اخلاقِ نبی

کر دیے رب نے بیاں قرآن کی آیات میں

وہ کہ جس سے ٹوٹتا ہو دل کسی انسان کا

ایک بھی جملہ نہیں ایسا نبی کی بات میں

چشمِ نم لے کر کھڑا تھا جالیوں کے سامنے

صدقۂ حسنین مجھ کو مل گیا خیرات میں

ہم گنہ گاروں کی بخشش کا یہی ہیں آسرا

لکھ رہے ہیں، پڑھ رہے ہیں، نعت جن لمحات میں

سبز گنبد کا تصور جب کیا میں نے جمالؔ

یوں لگا بیٹھا ہوا ہوں نور کی برسات میں