قابو میں نہیں ہے دل_شیدائے_مدینہ

قابو میں نہیں ہے دل شیدائے مدینہ

کب دیکھیے بر آئے تمنائے مدینہ

خوشبوئے رسالت سے ہے از بسکہ معطر

ہر ذرہ آبادی و صحرائے مدینہ

ہے بے خودی عشق حقیقی کا شناسا

ہر دل کہ ہے مخمور تولائے مدینہ

آتی ہے جو ہر شئے سے یہاں انس کی خوشبو

دنیائے محبت ہے کہ دنیائے مدینہ

اے وہ کہ سرور ابدی کا ہے طلب گار

پی ساغر دل سے مئے مینائے مدینہ

ڈر غلبۂ اعدا سے نہ حسرتؔ کہ ہے نزدیک

فرمائیں مدد سید والائے مدینہ