جان بلب ہوں آمری جاں الغیاث

جان بلب ہوں آمری جاں الغیاث

ہوتے ہیں کچھ اور ساماں الغیاث

درد مندوں کو دوا ملتی نہیں

اے دواے درد منداں الغیاث

جان سے جاتے ہیں بیچارے غریب

چارہ فرمائے غریباں الغیاث

حد سے گزریں درد کی بیدردیاں

درد سے بیحد ہوں نالاں الغیاث

بیقراری چین لیتی ہی نہیں

اے قرار بیقراراں الغیاث

خاک ہے پامال میری کو بکو

اے ہوائے کوئے جاناں الغیاث

المدد اے زلف سرور المدد

ہوں بلاؤں میں پریشاں الغیاث

دل کی الجھن دور کر گیسوئے پاک

اے کرم کے سنبلستاں الغیاث

اے سر پُر نور اے سر خدا

ہوں سراسیمہ پریشاں الغیاث

غمزدوں کی شام ہے تاریک رات

اے جبیں اے ماہ تاباں الغیاث

دل کے ہر پہلو میں غم کی پھانس ہے

میں فدا مژگان جاناں الغیاث

چشم رحمت آگیا آنکھوں میں دم

دیکھ حال خستہ حالاں الغیاث

مردمک اے مہر نور ذات بحت

ہیں سیہ بختی کے ساماں الغیاث

تیر غم کے دل میں چھد کر رہ گئے

اے نگاہ مہر جاناں الغیاث

اے کرم کی کان اے گوش حضور

سن لے فریاد غریباں الغیاث

عارض رنگین خزان کو دور کر

اے جنان آرا گلستان الغیاث

جان بلب ہوں جان بلب پر رحم کر

اے لب اے عیسی دوراں الغیاث

اے تبسم غنچہائے دل کی جاں

کھِل چکیں مرجھائی کلیاں الغیاث

اے دہن اے چشمۂ آب حیات

مر مٹے دے آب حیواں الغیاث

در مقصد کے لیے ہوں غرق غم

گوہر شاداب دنداں الغیاث

اے زبان پاک کچھ کہدے کہ ہو

رود بلائے بے زباناں الغیاث

اے کلام اے راحت جان کلیم

کلمہ گو ہے غم سے نالاں الغیاث

کام شہ اے کام بخش کامِ دل

ہوں میں ناکامی سے گریاں الغیاث

چاہ غم میں ہوں گرفتار الم

چاہ یوسف اے زنخداں الغیاث

ریش اطہر سنبل گلزار خلد

ریش غم سے ہوں پریشاں الغیاث

اے گلو اے صبح جنت شمع نور

تیرہ ہے شام غریباں الغیاث

غم سے ہوں ہمدوش اے دوش المدد

دوش پر ہے بار عصیاں الغیاث

اے بغل اے صبح کا فور بہشت

مہر بر شام غریباں الغیاث

غنچۂ گل عطر دان عطر خلد

بوئے غم سے ہوں پریشاں الغیاث

دست اقدس اے مری نسیاں جود

غم کے ہاتھوں سے ہوں گریاں الغیاث

اے کف دست اے ید بیضا کی جان

تیرہ دل ہو نور افشاں الغیاث

ہم سیہ ناموں کو اے تحریر دست

تو ہو دستاویز غفراں الغیاث

پھر بہائیں انگلیاں انہار فیض

پیاس سے ہے ہونٹوں پہ ہے جاں الغیاث

بہر حق اے ناخن اے عقدہ کشا

مشکلیں ہو جائیں آساں الغیاث

سینۂ پر نور صدقہ نور کا

بے ضیا سینہ ہے ویراں الغیاث

قلب انور تجھ کو سب کی فکر ہے

کر دے بے فکری کے ساماں الغیاث

اے جگر تجھ کو غلاموں کا ہے درد

میرے دکھ کا بھی ہو درماں الغیاث

پشت والا میری پشتی پر ہو تو

روبرو ہیں غم کے ساماں الغیاث

مہر پشت پاک میں تجھ پر فدا

دے دے آزادی کا فرماں الغیاث

تیرے صدقے اے کمر بستہ کمر

ٹوٹی کمروں کا ہو درماں الغیاث

پائے انور اے سر افرازی کی جاں

میں شکتسہ پا ہوں جاناں الغیاث

نقش پا اے نو گل گلزار خلد

ہو یہ اجڑا بن گلستاں الغیاث

اے سراپا اے سراپا لطف حق

ہوں سراپا جرم و عصیاں الغیاث

نیچے نیچے دامنوں والی عبا

خوار ہے خاک غریباں الغیاث

پڑ گئی شام الم میرے گلے

جلوہ صبح گریباں الغیاث

کھول مشکل کی گرہ بند قبا

بند غم میں ہوں پریشاں الغیاث

آستیں نقد عطا در آستیں

بینوا ہیں اشک ریزاں الغیاث

چاک اے چاک جگر کے بخیہ گر

دل ہے غم سے چاک جاناں الغیاث

عیب کھلتے ہیں گدا کے روز حشر

دامن سلطان خوباں الغیاث

دل ہے ٹکڑے ٹکڑے پیوند لباس

اے پناہ خستہ حالاں الغیاث

ہے پھٹے حالوں مرا رخت عمل

اے لباس پاک جاناں الغیاث

نعل شہ عزت ہے میری تیرے ہاتھ

اے وقار تاج شاہاں الغیاث

اے شراک نعل پاک مصطفیٰ

زیر نشتر ہے رگ جاں الغیاث

سرمہ اے چشم و چراغ کوہ طور

ہے سیہ شام غریباں الغیاث

ٹوٹتا ہے دم میں ڈورا سانس کا

ریشۂ مسواک جاناں الغیاث

آئینہ اے منزل انوار قدس

تیرہ بختی سے ہوں حیراں الغیاث

سخت دشمن ہے حسنؔ کی تاک میں

المدد محبوب یزداں الغیاث