ہم نے تقصیر کی عادت کر لی
ہم نے تقصیر کی عادت کر لی
آپ اپنے پہ قیامت کر لی
میں چلا ہی تھا مجھے روک لیا
مرے اللہ نے رحمت کر لی
ذکرِ شہ سن کے ہوئے بزم میں محو
ہم نے جلوت میں بھی خلوت کر لی
نارِ دوزخ سے بچایا مجھ کو
مرے پیارے بڑی رحمت کر لی
بال بیکا نہ ہوا پھر اس کا
آپ نے جس کی حمایت کر لی
رکھ دیا سر قدمِ جاناں پر
اپنے بچنے کی یہ صورت کر لی
نعمتیں ہم کو کھلائیں اور آپ
جو کی روٹی پہ قناعت کر لی
اس سے فردوس کی صورت پوچھو
جس نے طیبہ کی زیارت کر لی
شانِ رحمت کے تصدق جاؤں
مجھ سے عاصی کی حمایت کر لی
فاقہ مستوں کو شکم سیر کیا
آپ فاقہ پہ قناعت کر لی
اے حسنؔ کام کا کچھ کام کیا
یا یوں ہی ختم پہ رخصت کر لی
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
