نہ مایوس ہو میرے دکھ درد والے

نہ مایوس ہو میرے دکھ درد والے

درِ شہہ پہ آ ہر مرض کی دوا لے

جو بیمارِ غم لے رہا ہو سنبھالے

وہ چاہے تو دم بھر میں اس کو سنبھالے

نہ کر اس طرح اے دلِ زار نالے

وہ ہیں سب کی فریاد کے سننے والے

کوئی دم میں اب ڈوبتا ہے سفینہ

خدا را خبر میری اے ناخدا لے

سفر کر خیالِ رخِ شہ میں اے جاں

مسافر نکل جا اجالے اجالے

تہی دست و سودائے بازارِ محشر

مری لاج رکھ لے مرے تاج والے

زہے شوکت آستانِ معلیٰ

یہاں سر جھکاتے ہیں سب تاج والے

سوا تیرے اے ناخدائے غریباں

وہ ہے کون جو ڈوبتوں کو نکالے

یہی عرض کرتے ہیں شیرانِ عالم

کہ تو اپنے کتوں کا کتا بنالے

جسے اپنی مشکل ہو آسان کرنی

فقیرانِ طیبہ سے آکر دعا لے

خدا کا کرم دستگیری کو آئے

تیرا نام لے لیں اگر گرنے والے

درِ شہہ پر اے دل مرادیں ملیں گی

یہاں بیٹھ کر ہاتھ سب سے اٹھالے

گھرا ہوں میں عصیاں کی تاریکیوں میں

خبر میری اے میرے بدرالدجیٰ لے

فقیروں کو ملتا ہے بے مانگے سب کچھ

یہاں بیٹھ کر ہاتھ سب سے اٹھا لے

لگائے ہیں پیوند کپڑوں میں اپنے

اڑھائے فقیروں کو تم نے دو شالے

جو پیشِ صنم سر جھکاتے تھے اپنے

بنےتیری رحمت سے اللہ والے

نگاہے زِ چشمِ کرم بر حسنؔ کن

بکویت رسیدست آشفتہ حالے