ہزار جرم_و_خطا ہوں سیاہ_کار نہیں

ہزار جرم و خطا ہوں سیاہ کار نہیں

پہنچ گیا جو مدینے گناہ گار نہیں

نگاہ والوں میں اس کا کوئی شمار نہیں

غم حسین میں جو آنکھ اشک بار نہیں

تو کیوں نہ کوچۂ جنت پہ جان دے زاہد

کہ تیری آنکھوں نے دیکھا ہی کوئے یار نہیں

ہر ایک ذرۂ خاک مدینہ کہتا ہے

کہ اس دیار سے بہتر کوئی دیار نہیں

مدینہ تاج سر خلد کا نگینہ ہے

زمیں پہ عرش کی تصویر ہے مزار نہیں

رسول و راکب دوش رسولؐ یکتا ہیں

سواری ایسی نہیں ایسا شہسوار نہیں

بلا لو جلد مدینے ایازؔ کو شاہا

کہ زندگی کا جہاں میں کچھ اعتبار نہیں