غمِ الفت ہے دم کے ساتھ دم نکلے تو غم نکلے

غمِ الفت ہے دم کے ساتھ دم نکلے تو غم نکلے

محبت کا مزا جب ہے نہ دم نکلے نہ غم نکلے

یہ لطفِ زندگانی ہے کہ ہو نظارہ اس رخ کا

مزہ مرنے کا جب آئے کہ ان قدموں پہ دم نکلے

صلہ پایا ہے ہم نے مدحتِ خط مبارک کا

کہ عصیاں بھی ہمارے خط کشیدہ یک قلم نکلے

یہ ہے ایمان تم سا شافع محشر نہیں کوئی

مگر ڈھونڈو تو ہم سا بھی گنہگاروں میں کم نکلے

اسے کہتے ہیں باہم دل سے دل کو راہ ہوتی ہے

اُدھر محشر میں تم آئے ادھر قد سے ہم نکلے

ہمارا کام تھا راہِ محبت میں قدم رکھنا

تمہیں نے دستگیری کی تو اب کچھ پاؤں جم نکلے

مدینے کی جدائی دل میں کانٹا سی کھٹکتی ہے

فدا ہے دیکھیے اے لطفؔ کب یہ خارِ غم نکلے