تضمینی کلام - محصورِ الم ہستی ہے مری سلطان الہند غریب نواز

محصورِ الم ہستی ہے مری سلطان الہند غریب نواز

چھائی ہے گھٹا مایوسی کی سلطان الہند غریب نواز

اک روگ بنی ہے دل کی لگی سلطان الہند غریب نواز

یا خواجہ معین الدیں چشتی سلطان الہند غریب نواز

تم واقفِ رازِ خفی و جلی سلطان الہند غریب نواز

گھنگھور اندھیرا اور اس پر منجدھار میں ہے دل کی کشتی

امید بھی ٹوٹی جاتی ہے ہمت بھی ہوئی ہے پست مری

اس عالمِ رنج و غم میں بھلا، ہے کون جو دیکھے مجبوری

فریاد تمہیں سے ہے میری تکلیف سہی کیسی کیسی

ہو داد طلب کی دادرسی سلطان الہند غریب نواز

تھی آس بہت ملنے کی مگر دنیا نے مجھے کچھ بھی نہ دیا

چلتے ہوئے غم کے صحرا میں جب پیاس لگی تو اشک پیا

جینے کی تمنا میں ہر پل کچھ ایسے مرا کچھ ایسے جیا

منہ عیش و طرب نے پھیر لیا دن رات کے غم نے گھیر لیا

سب دور ہوں میرے رنج دلی سلطان الہند غریب نواز

اے جانِ عطا اے جانِ کرم ٹوٹے نہ مرے ارماں کا بھرم

موسم کی ہوائے نفرت میں سانسوں میں نہیں ہے وہ دم خم

اب دیکھ بھی لو یہ حال مرا چہرہ ہے اداس آنکھیں پُرنم

لائی ہے مجھے امیدِ کرم اس خاک کی اس در کی ہے قسم

آیا ہوں پئے حاجت طلبی سلطان الہند غریب نواز

میں چھوڑ کے تم کو جاؤں کہاں، ہے کون جو دکھ سکھ میرا سنے

اب کون کرے مری چارہ گری ہے کون جو زخمِ دل کو بھرے

خادم ہے تمہارا امجدیؔ جب فریاد کرے تو کس سے کرے

یہ داغؔ کہاں تک رنج سہے تم سے نہ کہے تو کس سے کہے

تم آلِ نبی اولادِ علی سلطان الہند غریب نواز