تسکین قلب روحِ تمنا کہیں جسے

تسکین قلب روحِ تمنا کہیں جسے

بیمار ذہن و دل کا مسیحا کہیں جسے

ایسا کوئی بھی صاحبِ حکمت نہیں ملا

دردِ دل و جگر کا مداوا کہیں جسے

مفلس کا بے کسوں کا غریبوں کا غم گسار

جود و سخا و لطف کا دریا کہیں جسے

اللہ کیا نہیں کوئی نور آشنائے حق

اب کون ہے کہ مہر تجلی کہیں جسے

ہے بے مثال دہر میں تو بے نظیر ہے

رنگ ایسا ہے کہ سب سے نرالا کہیں جسے

میخانۂ عمل کا تو وہ عالی ظرف ہے

عرفانِ حق کا ساغر و مینا کہیں جسے

اے التفاتؔ ہو جو سرا پائے بندگی

’’ایسا کہاں سے لاؤں کہ تجھ سا کہیں جسے‘‘