کبیر_الاولیا عالی مقام ہے تیرا

کبیر الاولیا عالی مقام ہے تیرا

جہاں میں زندۂ جاوید نام ہے تیرا

خدا نے شاہی تجھے لا زوال بخشی ہے

کہ ملک ملک بقائے دوام ہے تیرا

بلند نام ہے کیتھل کا تیرے نام کے ساتھ

کہ شہرہ ہند سے تا ملک شام ہے تیرا

تیرے ہی فیض کے جلوے ہیں جانب سرہند

تجھی سے شہر منور تمام ہے تیرا

کمال والے کرامت کا تیری کیا کہنا

کہ روضۂ مرجع ہر خاص و عام ہے تیرا

تیری وفا کا ہے جلوہ تیرا علی احمد

اسی سے پرتو یہ ہم پہ مدام ہے تیرا

ذرا توجہ اس ارشادؔ پر بھی ہو جائے

فریب دہر پہ مائل غلام ہے تیرا