جب کوچہ_احمد سے باد_سحری نکلی

جب کوچہ احمد سے باد سحری نکلی

اترائی ہوئی کیسی خوشبو سے بھری نکلی

یہ خوبیٔ قسمت ہے پہنچی نہ مدینے کو

بیکار تو سینے سے آہ جگری نکلی

اے جذبۂ دل تو ہی پہنچاتا مجھے واں تک

معلوم نہیں تجھ میں کیوں بے اثری نکلی

لو کفر کی عالم سے کافور ہوئی ظلمت

انوار محمد کی کیا جلوہ گری نکلی

ہے شور مچا ہر سو شوریدگی کا اپنی

اے مرحبا کیا اچھی شوریدہ سری نکلی

کوئی بھی نہیں ہمدم اپنا شب فرقت میں

غم خوار فقط اپنی آنکھوں کی تری نکلی

تا عمر رہے فائقؔ دیدار کی حسرت میں

جاں جسم سے آخر کو ارمان بھری نکلی