آشنائے رازِ ہستی، واقفِ ہر خیر و شر

آشنائے رازِ ہستی، واقفِ ہر خیر و شر

دل کی دنیا ہے ترے افکار سے زیر و زبر

صبر کا شیشہ تری ضربِ سخن سے ریز ریز

تیرے نغمے سے گریبانوں میں پیدا رُستخیز

جب تڑپ اٹھتا ہے تیرے شعر پر جذبِ دروں

کم نظر اس کو سمجھتے ہیں فقط جوشِ جنوں

فلسفے والے نہ سمجھیں گے کبھی یہ رازِ دل

گوشِ ظاہر تک پہنچتی ہے کہاں آواز دل

خاکِ تیرہ کو سراپا نور کر دیتا ہے تو

پردۂ انوار میں مستور کر دیتا ہے تو

روح یوں پاتی ہے تیرے فیض سے سوزِ دروں

مہر سے جس طرح پاتی ہے رگِ گل موجِ خوں