وہ رسول عربی فخر رسولان سلف

وہ رسول عربی فخر رسولان سلف

ذات اقدس سے لا جس کی زمانہ کو شرف

جس پہ نازل ہوا قرآن سا کامل مصحف

جس کے تابع میں جن و انس ملائک کی بھی صف

اک وہی شمع نبوت جو ضیا بار ہوئی

ساری تاریک فضا مطلع انوار ہوئی

ہر زمانے میں پیمبر بھی نبی بھی آئے

مصلح ملی و ملکی بھی رشی بھی آئے

حق کے جوئندہ بھی حق کے ولی بھی آئے

واقف محرم سر ازلی بھی آئے

آئے دنیا میں بہت پاک مکرم بن کر

کوئی آیا نہ مگر رحمت عالم بن کر

کس نے جام مئے توحید ملایا سب کو

کس نے پیغام مساوات سنایا سب کو

راستہ کس نے حقیقت کا دکھایا سب کو

کس نے اس حسن کا دیوانہ بنایا سب کو

تم نے دیکھا ہے بہت دفتر پیغام اس کا

اور یاں کوئی گذرا ہو تو لو نام اس کا

کوئی صدیق سا گذرا ہو تو للہ دکھاؤ

تم نے فاروق سا دیکھا ہو تو للہ دکھاؤ

کوئی عثمان سا آیا ہو تو للہ دکھاؤ

کوئی حیدر کل پایا ہو تو للہ دکھاؤ

ثانیٔ احمد بے میم تو کیا لاؤ گے

اس کی امت کی مثالیں بھی نہیں پاؤ گے