وہ رسول عربی، فخر رسولان سلف

وہ رسول عربی، فخر رسولان سلف

ذات اقدس سے ملا جس کی زمانہ کو شرف

جس پہ نازل ہوا قرآن سا کامل مصحف

جس کے تابع ہیں جن و انس و ملائک کے بھی صف

اک وہی شمع نبوت جو ضیا بار آئی!

ساری تاریک فضا مطلع انوار ہوئی

ہر زمانہ میں پیمبر بھی نبی بھی آئے

مصلح ملی و ملکی بھی رشی بھی آئے

حق کے جوئندہ بھی اور حق کے دل بھی آئے

واقف محرم سر ازلی بھی آئے

آئے دنیا میں بہت پاک و مکرم بن کر

کوئی آیا نہ مگر رحمت عالم بن کر

کس نے جام مئے توحید پلایا سب کو

کس نے پیغام مساوات سنایا سب کو

راستہ کس نے حقیقت کا دکھایا سب کو

کس نے اس حسن کا دیوانہ بنایا سب کو

تم نے دیکھا ہے بہت دفتر پیغام اس کا

اور ایسا کوئی گذرا ہو تو لو نام اس کا

کوئی صدیق سا گذرا ہو تو للہ دکھاؤ

تم نے فاروق سا دیکھا ہے تو للہ دکھاؤ

کوئی عثمان سا آیا ہو تو للہ دکھاؤ

کوئی حیدر کا ساپایا ہو تو للہ دکھاؤ

ثانیٔ احمد بے میم تو کیا لاؤ گے

اس کے امت کی مثالیں بھی نہیں پاؤ گے