نور اس ذات مقدس کا ہے پہلا بادل

نور اس ذات مقدس کا ہے پہلا بادل

بن گیے ارض و سما جب کہ وہ پھیلا بادل

ساری مخلوق ہے اس ابر کرم سے سیراب

دونوں عالم ہوئے پیدا جو وہ برسا بادل

پہلے ظاہر ہوا، اس مہر جہاں تاب کا نور

جب ہٹا پردۂ ظلمات عدم کا بادل

ذات احمد میں ہے یوں نور احد کا پنہاں

جس طرح برق درخشاں کا ہے پردا بادل

وہ تیرے روضۂ اقدس کی ہے رفعت جس کو

کر لیا کرتا ہے بس دور سے سجدہ بادل

شب اسریٰ جو اڑا تھا ترے توسن کا غبار

بن گیا چرخ پہ وہ کاہکشاں کا بادل

آستاں پر ترے اس کے جو رسائی نہ ہوئی

کیوں نہ اس غم سے کرے شیون و نالا بادل

آپ کا بحر عطا آئے جو طغیانی پر

ابھی بہتا پھرے مثلِ کف دریا بادل