محرومِ مئے حق ہے اس دور کا میخانہ

محرومِ مئے حق ہے اس دور کا میخانہ

یا خواجۂ خسرو تو بھردے مرا پیمانہ

اللہ رے تری خسرو ،وہ چشمِ کلیمانہ

بت خانہ ہوا کعبہ، کعبہ ہوا بت خانہ

اللہ رے اسرار و اندازِ حکیمانہ

ظاہر میں تو شاہانہ، باطن میں فقیرانہ

بےنور ہے مدت سے دل کا مرے کاشانہ

ہاں اب تو نظر آجا اے جلوۂ جانانہ

وہ جامِ حقیقت دے اے خسرو مستانہ

میں پی کے پکار اٹھوں، دیوانہ ہوں دیوانہ

انداز ترا خسرو ہر رنگ میں شاہانہ

گفتار حکیمانہ، کردار کریمانہ

تو پیکرِ روحانی، اک چشمۂ عرفانی

گنجینۂ علم وفن، اک شاعرِ فرزانہ

آ مجھ میں سما جا تو، میں تجھ میں سماجاؤں

تو شمعِ حقیقت ہے، میں ہوں ترا پروانہ

محفل میں تری خسرو مجذوب بھی سالک ہے

دیوانہ جو تیرا ہے، فرزانہ ہے فرزانہ

دے شیخ و برہمن کو سر مستیٔ روحانی

بے کیف ہے پیمانہ، بے رنگ ہے میخانہ

تو صاحبِ قسمت ہے، تو صاحبِ عظمت ہے

حاصل ہے تجھے وصلِ سنگِ درِ جانانہ

محبوبِ الٰہی کے محبوب، خدا شاہد

روشن ہے ترے دم سے دنیا کا سیہ خانہ

مجھ کو بھی حقیقت کے انوار سے پُر کر دے

تو نورِ تجلی ہے، میں ظلمتِ ویرانہ

کچھ پاس نہیں میرے کیا نذر کروں تیری

گلہائے عقیدت کا لایا ہوں میں نذرانہ