ترے حسن کا کرشمہ مری ہر بہار خواجہ

ترے حسن کا کرشمہ مری ہر بہار خواجہ

ترے غم کا اک شگوفہ دل داغ دار خواجہ

مجھے یوں بھی تھا گوارا غم انتظار خواجہ

مرے بس میں کاش ہوتا دل بے قرار خواجہ

تری چشم خواجگی پر مری جاں نثار خواجہ

تری اک نگاہ بس ہے مرے تاجدار خواجہ

یہ نمود و بود میری ترے دم سے معتبر ہے

ترے اعتبار سے ہے مرا اعتبار خواجہ

مری آرزو سے بڑھ کر ترے فضل نے نوازا

اس ادائے خواجگی پر مری جاں نثار خواجہ

مجھے چارہ ساز اپنے نظر آئیں کیوں نہ دشمن

کہ ہر ایک زخم دل ہے تری یادگار خواجہ

تری سمت قبلۂ دل ترا روضہ کعبۂ جاں

ترے گرد گھومتے ہیں ترے جاں نثار خواجہ

نہ فدا ہو کیسے کاملؔ دل و جاں سے ہر ادا پر

ترے حسن کا پجاری ہے یہ خاکسار خواجہ