کرے عشق محمود پر کب وہ ناز

کرے عشق محمود پر کب وہ ناز

کہ اپنی قدر جانتا ہے ایاز

وہ کہتا ہے میں تو ہوں اور تو ہی میں

کہے کس سے بندہ یہ مولیٰ کا راز

کرم سے جو مولیٰ کے ہو سرخرو

وہ عالم میں کیوں کر نہ ہو سرفراز

عبودیت انسان کا ہے کمال

کہ حق بندگی کا ہے عجز و نیاز

ہے وہ مرد دوانہ یا بے شعور

نہ ہو نیک و بد کا جسے امتیاز

تو اس ناخدا کو نہ کہہ با خدا

گناہوں سے جس کا لدا ہو جہاز

ترے کام سب بن پڑیں گے ترابؔ

کہ درویش کا ہے خدا کارساز