مدینے کی طرف میں تشنہ دل جاتا ہوں اس خاطر

مدینے کی طرف میں تشنہ دل جاتا ہوں اس خاطر

کہ جامِ بیخودی مجھ کو پلاؤ یا رسول اللہ

تو ہی غمخوار ہے میرا تو ہی دلدار ہے میرا

مجھے اغیار سے ہر دم بچاؤ یا رسول اللہ

بصدق و عجز و مسکینی، پڑا ہوں راہ میں تیری

محبت اور شفقت سے اٹھاؤ یا رسول اللہ

تری دوری و مہجوری سے ہوں میں بے قرار آقا

مرا یہ داغِ مہجوری مٹاؤ یا رسول اللہ

خدارا موت سے پہلے مری آنکھیں یہ روشن ہوں

تجلی نورِ عرفانی دکھاؤ یا رسول الله

درِ سلطان پہ طوقِ بندگی ڈالے کریمؔ آیا

اسے خوانِ کرم سے کچھ کھلاؤ یا رسول اللہ