سیدی امجد علی شانِ طریقت آپ کی

سیدی امجد علی شانِ طریقت آپ کی

دردِ حق حق حق میں جلوہ گر ہے عظمت آپ کی

کون جانے علم حق میں کیا ہے وسعت آپ کی

آپ جانے حق کا حق، اور حقیقت آپ کی

لے گیا منزل بہ منزل کس بلندی پر سلوک

فرش نے کیا عرش نے دیکھی ہے رفعت آپ کی

یہ وجودی لا وجودی میں صدائے نیستی

خوب ہے دوئی مٹانے کی طریقت آپ کی

آپ نے سمجھا دیا جب فلسفہ توحید کا

آئینہ خود بن گئی تفسیر وحدت آپ کی

حل کئے کیا کیا تصوف کے مسائل آپ نے

کر گئی اسرار حق افشا خلافت آپ کی

ظاہر و باطن کا منظر دیکھتے تھے جابجا

در حقیقت تھی بصارت بھی بصیرت آپ کی

آپ ہیں اہل مراتب میں عظیم المرتبت

سینکڑوں ولیوں سے اعلیٰ ہے ولایت آپ کی

آپ ہیں رازِ بقائے در فنا کے رازداں

اہلِ حق ہی جانتے ہیں یہ حقیقت آپ کی

سرِّ ہستی اور سرِّ وحدت و ذات و صفات

جلوۂ اسرارِ کل میں گم ہے عظمت آپ کی

آپ کو سمجھا نہ جس نے کیا وہ سمجھے رازِ حق

ہاں وہ سمجھے جس کو حاصل ہو عقیدت آپ کی

لے کے جاتے ہیں مرادیں آپ کے دربار سے

غم زدوں پر خاص ہوتی ہے عنایت آپ کی

چشم ناداں کو نظر آتا تو آتا کیا نظر

دیکھنے والوں نے دیکھی ہے کرامت آپ کی

جستجوئے سرِّ حق میں وقف کردی زندگی

تھی نہاں ذاتِ حقیقی میں حقیقت آپ کی

مل گئی اس کو متاع دین ودنیا مل گئی

آگئی قسمت سے جس کو راس بیعت آپ کی

کیا شریعت کیا طریقت اور کیا ہے معرفت

اس نے سمجھی مل گئی جس کو ہدایت آپ کی

ہوگئی حضرت تصدق پر تصدق معرفت

وہ خلافت دے گئی شان نیابت آپ کی

عارف اللہ بھی آخر بقا بھی آپ ہیں

منقبت میں کیا بیاں ہو شانِ عظمت آپ کی

اک نظر پڑتی کرم تو سنور جاتی حیات

کوش کوثرؔ پر کبھی ہوتی عنایت آپ کی