محو گردش ہے سدا جام ابو طالب کا

محو گردش ہے سدا جام ابو طالب کا

دیپ روشن ہے سر عام ابو طالب کا

کچھ وہ سمجھا نہیں پیغام ابو طالب کا

جس کے دل میں نہیں اکرام ابو طالب کا

سر جھکاتے ہیں ادب اور عقیدت کے ساتھ

اہل دل لیتے ہیں جب نام ابو طالب کا

کربلا ہو، وہ ہو مشہد کہ گلستان نجف

چار جانب ہے کرم عام ابو طالب کا

کون کہتا ہے کہ وہ داخل اسلام نہ تھے

خود ہے ممنون یہ اسلام ابو طالب کا

شاہ عالم کے کفیل آپ بنے دنیا میں

یہ مقام اور یہ انعام ابو طالب کا

مصطفیٰ ان کے بھتیجے تو علی نورِ نظر

ہے فرشتوں میں بھی اکرام ابو طالب کا

قبلۂ اہل ولا روئے ابو طالب ہے

مرحبا چہرۂ گلفام ابو طالب کا

انس و جاں کیا ہیں، یہاں حور و ملک بھی دیکھے

با ادب لیتے ہوئے نام ابو طالب کا

دل میں میرے بھی ہے توقیر و عقیدت ان کی

میں بھی ہوں بندۂ بے دام ابو طالب کا

میں بھی تو میکدۂ حیدر و زہرا کا ہوں رند

میرے ہاتھوں میں بھی ہے جام ابو طالب کا

رشک کعبہ ہیں شرف صحن ابو طالب کے

ہے فلک مجد ہر اک بام ابو طالب کا

دو خبر واعظ کج فکر کو جا کر رومیؔ

نام لیتا ہے سر عام ابو طالب کا