یہاں جب شمع روشن ہے تو پروانے کہاں جائیں

یہاں جب شمع روشن ہے تو پروانے کہاں جائیں

لٹا دیں گے یہیں اب جان دیوانے کہاں جائیں

ہمیں تو مل گیا ہے آستانِ شیخ قسمت سے

جنونِ شوق کو اب پھر سے الجھانے کہاں جائیں

عطا ہوتی ہے اس در سے فقیروں کو شہنشاہی

اسے ہم چھوڑ کر دامن کو پھیلانے کہاں جائیں

کبھی اس در سے کوئی غیر بھی خالی نہیں جاتا

پرستار آپ کے یہ جانے پہچانے کہاں جائیں

نگاہِ لطف سے مٹ جائے گی سب بے کلی دل کی

مریضِ عشق اپنی نبض دکھلانے کہاں جائیں

مٹا دو تشنگی پیاسوں کی اب تو پیر میخانہ

شرابِ عشق پینے رند میخانے کہاں جائیں

جبینِ شوق نے بوسے لیے اس آستانے کے

خضرؔ ہم اپنی قسمت کو بدلوانے کہاں جائیں