خود نور اور نور کی اپنے ضیا ہیں آپ

خود نور اور نور کی اپنے ضیا ہیں آپ

ہر اک صفت میں ذات سے جلوہ نما ہیں آپ

محبوب رب ہیں قبلۂ اہل صفا ہیں آپ

ہر ایک اہل دل کا دلی مدعا ہیں آپ

گردن کشان حسن بھی ہیں سرنگوں جہاں

ایسے بڑے مقام پہ غوث الوریٰ ہیں آپ

تشبیہ کا یہ رنگ ہے تنزیہہ کا یہ حال

ذات نبی میں ذات خدا میں فنا ہیں آپ

پروانہ جس کا حسن ہے وہ شمع ہیں حضور

ادراک و فہم سب سے وراءالورا ہیں آپ

روح روان عشق و حیات نگاہ شوق

کتنی حسیں تجلیٔ نور خدا ہیں آپ

کشتی شکستہ لاکھ ہو طوفاں ہزار ہو

ساحل ہمارے ساتھ ہے جب نا خدا ہیں آپ

بگڑے ہوئے غلام کی بگڑی بنائیے

شیر خدا کے شیر ہیں مشکل کشا ہیں آپ

یہ حسن اتفاق بھی قسمت کی بات ہے

سے میرے دل میں درد ہے اس کی دوا ہیں آپ

پروانہ حدوث ہے شمع قدم کے ساتھ

کاملؔ زہے نصیب کہاں اور کیا ہیں آپ