جو آؤ تم میرے مہماں حسام الدین حیدر خاں

جو آؤ تم میرے مہماں حسام الدین حیدر خاں

کروں دل نذر جاں قرباں حسام الدین حیدر خاں

کہیں ہیں اہلِ معنی دیکھ کر مصر حقیقت میں

بصورت ہے مہ کنعاں حسام الدین حیدر خاں

تری ابرو کی جانب صورتِ قبلہ نما دل ہے

سمجھ کر قبلۂ ایماں حسام الدین حیدر خاں

فقط تحریر خط ہے کچھ نہ تفسیرِ حسینی ہے

کہ ہے رُخ بھی تیرا قرآں حسام الدین حیدر خاں

کریں ہیں لب ترے وقتِ سخن گویا مسیحائی

کہ جی اٹھتا ہے ہر بے جاں حسام الدین حیدر خاں

نہ کیوں ہو دور تیرے دیکھنے سے دردِ دل اپنا

کہ ہے تو درد کا درماں حسام الدین حیدر خاں

گلوں کے زخم دل پر خندۂ دنداں نما تیرا

چمن میں ہے نمک افشاں حسام الدین حیدر خاں

میری آنکھوں سے شکل اپنی اگر دیکھی تو رہ جائے

بہ شکل آئینہ حیراں حسام الدین حیدر خاں

دل معروفؔ سے تیری محبت کیوں نہ ظاہر ہو

رہی کیا گل میں پنہاں بو حسام الدین حیدر خاں